موسم الموهفين

فكري قاسم*

-----------

قرحت الحرب الداخلية ولقت لها موهفين كثر ، وقرحت الحرب الخارجية ولاقت لها موهفين كثر برضه وكل طرف يقول " الحرب فرضت علينا وكل طرف هات يادبيج فوق الأبرياء اللي كارهين ام الحرب . 

واليوم اكثر من سنة وتسعة اشهر من نشوب الحرائق الهائلة في بيتنا الكبير، المحاربين متعبين والناس متعبين والبلد بأكمله تعبان و"الموهفين" مشعلي الحرائق ، جلابي الأسية والفتن .

عمل يا شعب ، كلما قاربت النار تخمد اشعلوها من جديد . تقولهم خلااااص : البيت بيحرق ياخلق الله . الدخان يتصاعد من كل مكان والصراخ والعويل ينط من كل النوافذ والبيبان، يتقافزوا لك الموهفين ساع الرباح :

- منو السبب ؟ منو السبب ياخاين ياعميل

- ياخي تعال نطفي الحريق اول ونبصر اينه قرح الشرت وبعدا لنا خبر

- ومنو السبب في الشرت هذا ! اسكه قولنا منوه ؟ ياعفاشي يارافضي ياهن كووولهن .

- ياخي لما يكون في حريق في البيت ، اهل البيت في البداية ينبعوا يطفوا الحريق وبعدا لنا خبر، البيييييييت بيحرق الان وكل شبر طالته الحرائق والنار تشتعل في القلوب . وكم اطفال مروعين وكم ايتاء فقدوا ابائهم وكم امهات فقدن ابنائهن وكم نساء فقدن ازواجهن وكم أسر فقدت كل مالديها وكم نازحين وكم جرائم وكم بشاعات وكم مجرمين وكم سفلة وكم لصوص يقطعون الشوارع ؟ ينبعوا لك الوهفين انفسهم:

- ما ذلحين سمعنا صوتك؟ اينك يوم قصف صعدة اينك يوم قصف تعز اينك يوم قصف عدن ؟

- ايواااه اننا؟ في السينمه الصدق ومخبي عليكم . يعني اسألكم بالله فين باكون ؟غير اننا متحمل جهالي وهارب من جنانكم من قرية لاقرية ومن ضاحة لاضاحة ، فين باكون يعني؟

- مله منو السبب في هذا كله ؟ اسكه قول ياعميل السعودية وياعدو الوطن .

- ايواااااه ...منو السبب !؟

وتدار معارك طاحنة حول من هو السبب ، فيما الحريق يكبر في كل مكان ويلتهم امامه كل شيء ..كيف تقنع الموهفين بأن الجهل هو اساس كل الحرائق التي جعلت من بيتنا الكبير اكبر تجمعا للمشوهين والمعتوهين الذين هم في الاساس نتاج حرائق سابقة شهدتها حروب الصراع على السلطة في اليمن .

- ناهي ناهي ومنو السبب في هذه الحروب والصراعات كلها ومنو الذي وصلنا لهذا الحال؟اسكه اتشاجع وقولنا منوه ؟

_ يااخي انا وامي وزوجتي وابني ، السبب .. ايواااه احنا السبب لأن احنا جالسين بنهرب ، خنا الوطن في احلك ظروفه وهو كان راكن علينا قوي ، ايوه احنا خنا الوطن، العن ابو امه اللي يكذب، ومستعدين نسلم انفسنا بكره لأقرب عدالة ينظمها قانون في البلد ، وذلحين تعال نطفي الحريق، بيتنا يامغفل هو الذي بيحرق .. بيتنا كلنا مش بيت ابو احد .. شلوا لخيب .

من حائط الكاتب بالفيس بوك